Göyçayda təhlükə saçan məktəb: Şagirdlər sinif otaqlarında necə sağ qalır?

Göyçay rayonunun Çərəkə kəndində yerləşən Siyavuş Mirzəyev adına 1 nömrəli tam orta məktəbin binası ciddi təhlükə altındadır. 1969-cu ildən fəaliyyət göstərən bu təhsil müəssisəsi uzun müddətdir əsaslı təmir edilmədiyi üçün sakinlərin narazılığına səbəb olub.

Minval.info xəbər verir ki, məktəbin şagirdləri və müəllimləri üçün təhlükəsizlik məsələləri ciddi narahatlıq doğurur. Sakinlərin sözlərinə görə, sinif otaqları bərbad vəziyyətdədir, pəncərələr sınıqdır və sanitar qovşaq mövcud deyil. Bu səbəbdən, şagirdlər gün ərzində təbii ehtiyaclarını ödəməkdə çətinlik çəkirlər.

Mərkəzi Aran Regional Təhsil İdarəsi məsələ ilə bağlı açıqlama verərək, məktəbin vəziyyətinin nəzarətdə saxlanıldığını bildirib. 2025-ci ildə məktəbin dam örtüyü və üç sinif otağının cari təmir edildiyi, lakin digər hissələrin təmirinin mərhələli şəkildə davam etdiriləcəyi vurğulanıb. Təhsil müəssisələrinin tikintisi və təmiri növbəlilik və prioritetlik prinsiplərinə əsaslanaraq həyata keçirilir.