Əqli Mülkiyyət Agentliyində status dəyişikliyi baş verir

Əqli Mülkiyyət Agentliyinin bir sıra əməkdaşlarının dövlət qulluqçusu statusu ləğv ediləcək. Bu barədə Baş nazir Əli Əsədov tərəfindən müvafiq sərəncam imzalanıb.

Minval.info xəbər verir ki, sərəncama əsasən, Əqli Mülkiyyət Agentliyi, Ədliyyə Nazirliyi, Maliyyə Nazirliyi və digər aidiyyəti dövlət orqanları ilə razılaşdırmaqla, “Dövlət rüsumu haqqında” Qanunda nəzərdə tutulmuş hüquqi faktların qeydiyyatı ilə bağlı xidmətlər göstərən əməkdaşlarının dövlət qulluqçusu statusunun ləğvi ilə bağlı təkliflərini iki ay müddətində Nazirlər Kabinetinə təqdim etməlidir.

Bu prosesin icrası Azərbaycan Respublikası Nazirlər Kabineti Aparatının Hüquq və qanunvericilik şöbəsinə həvalə edilib. Qeyd edək ki, sərəncam sentyabrın 1-dən qüvvəyə minib.