Əməkdar artist Səvda Saleh insultdan sonra komada

Azərbaycanın Əməkdar Artisti və uzun illər Azərbaycan radiosunda çalışmış Səvda Saleh (Məmmədzadə) 1 sentyabr tarixində təcili olaraq reanimasiya şöbəsinə yerləşdirilib. O, insult keçirdikdən sonra komaya düşüb.

Minval.info xəbər verir ki, Səvda Salehin qızı Gültən Ramazanova anasının hazırda Nizami Tibb Mərkəzində olduğunu və vəziyyətinin son dərəcə ağır olduğunu bildirib. 95 yaşlı Səvda Saleh səhər saatlarında qızı tərəfindən ziyarət edildikdən sonra, günorta saatlarında onunla əlaqə saxlamaq mümkün olmayıb. Telefon zənglərinə cavab verilmədiyi üçün Gültən Ramazanova narahat olub və dərhal Fövqəladə Hallar Nazirliyi, polis, prokurorluq və təcili tibbi yardım xidmətinə müraciət edib. Hadisə yerinə gələn xilasedicilər evin qapısını açaraq Səvda Salehi mətbəx və balkon arasında yerdə tapıblar.

İlkin ehtimallara görə, Səvda Saleh iskemik insult keçirib və bu səbəbdən yıxılaraq huşunu itirib. Xəstəxanada həkimlər onun beynində geniş iskemik zədələnmə olduğunu təsdiqləyiblər. Qızı Gültən Ramazanova anasının 65 ilini Azərbaycan radiosuna həsr etdiyini və hər kəsdən onun sağalması üçün dua etmələrini xahiş edib.