Emal sənayesində işçi tələbatı artdı!

2025-ci ilin sonunda Azərbaycanda işçi qüvvəsinə olan tələbatın böyük hissəsi emal sənayesinə yönəlib. Bu sektorda işçi qüvvəsinə olan tələbat 34 min 299 nəfər təşkil edib ki, bu da ümumi tələbatın təxminən 55,8 faizini əhatə edir. Digər sahələrdə isə bu göstərici daha aşağıdır.

Minval.info xəbər verir ki, tikinti sektorunda 2 min 744, turistlərin yerləşdirilməsi və ictimai iaşə sahəsində 2 min 299, təhsil sahəsində 2 min 274, səhiyyə və sosial xidmətlərdə isə 2 min 184 nəfərlik işçi qüvvəsinə tələbat qeydə alınıb. Maliyyə və sığorta sektorunda isə bu rəqəm cəmi 189 nəfərdir.

ReAL Partiyasının sədri, iqtisadçı ekspert Natiq Cəfərli bildirib ki, emal sənayesində işçi qüvvəsinə tələbatın artmasının əsas səbəbi ölkədə həyata keçirilən yeni layihələrdir. O, alternativ enerji layihələrinin də bu prosesə təsir etdiyini qeyd edib. Ekspertin fikrincə, 2029-cu ilə qədər bu sahədə işçi qüvvəsinə tələbat artmağa davam edəcək.

ƏLAQƏLİ

Bunu da oxu

Bayramov yeni İsveç səfiri ilə görüşdü

04.09.2026 - 20:59

Bank və sığorta sektorlarında isə işçi tələbatının azalması rəqəmsallaşma ilə əlaqələndirilir. Onlayn bankçılıq və sığorta xidmətlərinin genişlənməsi nəticəsində ənənəvi əməliyyatlar insan əməyi olmadan həyata keçirilir ki, bu da işçi tələbatını azaldır. Ekspertlər yaxın gələcəkdə bu sektorlarda işçi tələbatının artacağını gözləmir.

Beləliklə, əmək bazarındakı rəqəmlər iqtisadiyyatın müxtəlif sahələrində fərqli tendensiyaların formalaşdığını göstərir. Yeni istehsal və investisiya layihələri emal sənayesində əlavə işçi qüvvəsinə ehtiyacı artırdığı halda, bank və sığorta sektorunda rəqəmsallaşma ənənəvi iş yerlərinə tələbatı tədricən azaldır.