Dağlıq bölgələrdə yağış və şimşək müşahidə olunub

Azərbaycanın əksər rayonlarında hava şəraiti əsasən yağmursuz keçib. Lakin axşam və gecə saatlarında bəzi dağlıq və dağətəyi rayonlarda yağış yağıb və şimşək çaxıb.

Minval.info xəbər verir ki, Milli Hidrometeorologiya Xidmətinin məlumatına görə, ayrı-ayrı yerlərdə qısamüddətli leysan xarakterli yağıntılar qeydə alınıb. Düşən yağıntının miqdarı Balakəndə 8 mm, Kəlbəcər və Gədəbəydə 7 mm, Daşkəsəndə 5 mm, Göygöldə 4 mm, Goranboyda 3 mm, Sədərəkdə 2 mm, Şəki, Tovuz, Şahdağ, Şəmkir, Gəncə, Naxçıvan, Şərur və Şahbuzda isə 1 mm-dək olub.

Bəzi bölgələrdə şimal-qərb küləyi əsib. Küləyin maksimal sürəti Bakıda və Abşeron yarımadasında 20 m/s, Culfada 17 m/s, Naxçıvanda isə 16 m/s-yə çatıb. Havanın maksimal temperaturu Bakıda və Abşeron yarımadasında 31, Naxçıvan Muxtar Respublikasında 36, Aran rayonlarında 35, dağlıq rayonlarda isə 25 dərəcəyədək isti müşahidə olunub.