Cüzam ABŞ-da yenidən yayılır: Təhlükə artır

Dünyanın ən qədim və qorxunc yoluxucu xəstəliklərindən biri olan cüzam, digər adı ilə Hansen xəstəliyi, ABŞ-da yenidən yayılmağa başlayıb. 2026-cı ilin ilk aylarında yalnız Florida ştatında 19 yeni yoluxma faktı qeydə alınıb. Orta əsrlərdə hökmdarları belə dəhşətə gətirən bu xəstəliyin yayılması narahatlıq doğurur.

Minval.info xəbər verir ki, tibb elmləri doktoru, professor Adil Qeybulla cüzamın “mycobacterium leprae” bakteriyasının törətdiyi infeksion xəstəlik olduğunu bildirib. Bu xəstəlik müəyyən xüsusiyyətlərinə görə vərəmə bənzəyir və müxtəlif klinik formalarda özünü göstərə bilər. Cüzamın inkubasiya dövrü orta hesabla 1-5 il davam edir, lakin bəzi mənbələrdə bu müddətin 1 ildən 20 ilə qədər dəyişə bildiyi qeyd olunur. Xəstəlik ilkin mərhələdə dəridə müxtəlif səpkilər və rəng dəyişiklikləri ilə özünü göstərir. Müalicə olunmadıqda isə sonrakı mərhələlərdə yaralar yarana, sinirlər və daxili orqanlar zədələnə bilər.

Professor Qeybulla qeyd edib ki, son illərdə cüzamın müalicəsində ciddi irəliləyişlər əldə olunub. Xəstəliyin müalicəsi mümkündür və vaxtında müalicəyə başlanıldıqda xəstənin yoluxduruculuğu qısa müddətdə əhəmiyyətli dərəcədə azalır. Cüzam yoluxucudur və uzunmüddətli, yaxın təmas zamanı, əsasən tənəffüs yolu ilə yayılır. Lakin xəstə müalicəyə başladıqdan sonra yoluxduruculuğunu itirir. Bu səbəbdən xəstəliyin erkən aşkarlanması və vaxtında müalicəyə başlanılması mühüm əhəmiyyət daşıyır.

ƏLAQƏLİ

Bunu da oxu

Bəhruz Vaqifoğlu pantomim teatrına rəhbər təyin edildi

03.09.2026 - 18:42

Azərbaycanda da cüzam xəstəliyinə rast gəlinir. Qloballaşan dünyada heç bir ölkənin müxtəlif infeksion xəstəliklərdən tam təcrid olunması mümkün deyil. Bu baxımdan, sərhəd-keçid məntəqələrində və kütləvi tədbirlər zamanı müvafiq sanitar-epidemioloji və profilaktik tədbirlərin görülməsi vacibdir. Hər hansı risk yarandıqda isə aidiyyəti qurumlar tərəfindən zəruri tədbirlər həyata keçirilməlidir.