Ceyhun Bayramov Gürcüstanın yeni səfiri ilə əməkdaşlıq perspektivlərini müzakirə edib

Azərbaycan xarici işlər naziri Ceyhun Bayramov Gürcüstanın Azərbaycana yeni təyin olunmuş səfiri Qiorqi Zakaraşvilini qəbul edib. Görüşdə iki ölkə arasında mövcud olan dostluq və mehriban qonşuluq münasibətlərinin əhəmiyyəti vurğulanıb.

Minval.info xəbər verir ki, Xarici İşlər Nazirliyinin məlumatına görə, Ceyhun Bayramov səfiri təyinatı münasibətilə təbrik edərək, ona gələcək fəaliyyətində uğurlar arzulayıb. Görüş zamanı ikitərəfli əməkdaşlığın inkişafına xüsusi əhəmiyyət verildiyi qeyd olunub.

Tərəflər arasında Azərbaycan-Gürcüstan tərəfdaşlıq münasibətlərinin cari vəziyyəti və gələcək perspektivləri, iqtisadi-ticarət əlaqələri, enerji təhlükəsizliyi və nəqliyyat-kommunikasiya layihələri müzakirə edilib. Regionun sabitliyi və inkişafı üçün bu əlaqələrin əhəmiyyəti vurğulanıb.

ƏLAQƏLİ

Bunu da oxu

Nazirlər Kabineti müəllimlər üçün geyim qaydalarını təsdiqlədi

06.10.2026 - 19:50

Beynəlxalq təşkilatlar çərçivəsində qarşılıqlı dəstəyin önəmi də görüşdə qeyd olunub. Tərəflər enerji və nəqliyyat sahələrində birgə həyata keçirilən layihələrin, xüsusilə Bakı-Tbilisi-Ceyhan, Cənub Qaz Dəhlizi və Bakı-Tbilisi-Qars dəmir yolunun regional və qlobal əhəmiyyətini müzakirə ediblər.

Ceyhun Bayramov, həmçinin, post-münaqişə dövründə Azərbaycanın işğaldan azad edilmiş ərazilərdə apardığı bərpa işləri və Azərbaycan-Ermənistan sülh prosesi barədə səfiri məlumatlandırıb. Səfir Zakaraşvili isə səmimi qəbula görə təşəkkür edərək, iki ölkə arasında strateji tərəfdaşlığın inkişafı üçün çalışacağını bildirib.