Çağırışçıların Tibbi müayinəsində yeni mərhələ: Kimlər yekun yoxlamaya düşür?

Müddətli həqiqi hərbi xidmətə çağırılan vətəndaşların tibbi müayinəsi zamanı müəyyən kateqoriyalara aid edilən şəxslər yekun tibbi müayinəyə cəlb olunurlar. Bu kateqoriyalar arasında sıradankənar həqiqi hərbi xidmətə yararlılıq, sağlamlıq vəziyyətinə görə müvəqqəti yararsızlıq və dinc dövrdə həqiqi hərbi xidmətə yararsızlıq kimi hallar yer alır.

Minval.info xəbər verir ki, bu barədə Əmək və Əhalinin Sosial Müdafiəsi Nazirliyi məlumat yayıb. Nazirliyin tabeliyindəki Dövlət Tibbi Sığorta və Ekspertiza Agentliyinin Tibbi Qiymətləndirmə Mərkəzində müayinələr aparılır.

Yekun tibbi müayinə, Mərkəzi Hərbi-Həkim Komissiyası tərəfindən Nazirliyin “Tibbi şəhadətləndirmə” altsisteminə daxil edilən göndəriş əsasında, e-növbəlilik qaydasında həyata keçirilir. Mərkəz ən müasir tibbi avadanlıqlarla təchiz edilib və burada ixtisaslaşmış peşəkar həkimlər tərəfindən müxtəlif tibbi analizlər və müayinələr aparılır.