Bakının Binəqədi şosesində yol hərəkəti yenilənir

Bakının Binəqədi şosesində Mehdiabad yolu və Nicat Mustafayev küçəsi ilə kəsişmələrində yol hərəkətinin təşkili dəyişdirilir. Bu ərazilərdə xüsusilə günün pik saatlarında nəqliyyat sıxlığı və buraxıcılıq qabiliyyətinin aşağı olması müşahidə edilir.

Minval.info xəbər verir ki, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) bu vəziyyətin yaxşılaşdırılması məqsədilə yeni layihə həyata keçirir. Layihə çərçivəsində yol nişanları və nişanlanma xətləri vasitəsilə hərəkətin kanallaşdırılması nəzərdə tutulur. Kəsişmələrdə hərəkət zolaqlarının artırılması və Əttarlar küçəsindən yalnız sağa hərəkətin təşkili planlaşdırılır.

Bu tədbirlər yolun buraxıcılıq qabiliyyətinin artırılmasına və münaqişəli nöqtələrin minimuma endirilməsinə xidmət edəcək. Eyni zamanda, işıqfor rejiminin optimallaşdırılması ilə əsas hərəkət istiqaməti üzrə yaşıl faza uzadılacaq ki, bu da nəqliyyat axınının daha səmərəli və fasiləsiz hərəkətini təmin edəcək.