Bakının bəzi ərazilərində işıq kəsintisi olacaq!

Bu gün Bakının bəzi ərazilərində elektrik enerjisi verilişində müvəqqəti məhdudiyyətlər tətbiq ediləcək. Elektrik enerjisinin keyfiyyətini artırmaq və artan yük tələbatını qarşılamaq məqsədilə avqustun 28-də paytaxtda bir sıra Transformator Məntəqələrində təmir və yenidənqurma işləri həyata keçiriləcək.

Minval.info xəbər verir ki, “Azərişıq” ASC-nin məlumatına görə, Yasamal Rayon Enerji Təchizatı və Satışı İdarəsinin ərazisində saat 10:00-dan 13:00-dək Abbas Mirzə Şərifzadə, Xıdır Mustafayev, Xaqan Dadaşov və Vasif Əliyev küçələrinin bəzi hissələrində elektrik enerjisinin verilişində məhdudiyyətlər olacaq. Nərimanov RETSİ-nə daxil olan Aşıq Alı və Yəhya Bakuvi küçələrinin bəzi yerlərində isə saat 09:00-dan 13:00-dək enerjinin verilişində fasilələr yaranacaq.

Planlı fasilələr saat 10:00-dan 16:00-dək Suraxanı rayonu Hövsan bağları, Kondisioner bağları və Hövsan-Türkan yolu bağlar yaşayış massivlərinin bir hissəsini əhatə edəcək. Biləcəri Enerji Təchizatı və Satışı İdarəsi ərazisində 6 kV-luq “Asfaltzavod” hava xəttində aparılacaq yenidənqurma işləri ilə əlaqədar saat 10:00-dan 15:00-dək Xocasən-Sədərək yolunun sağ və sol hissələrində enerjinin verilişi məhdudlaşdırılacaq.