Bakıkart istifadəçiləri üçün ödəniş gecikməsi narahatlığı

Son günlərdə ictimai nəqliyyatda BakıKart istifadəçiləri arasında kartlardan vəsaitlərin gecikmə ilə çıxılması ilə bağlı narahatlıqlar yaranıb. Bu vəziyyət xüsusilə gecə saatlarında eyni istiqamətlərdə təkrarlanan ödənişlər şəklində müşahidə olunur.

Minval.info xəbər verir ki, BakıKart nümayəndələri bu halın NFC ödəniş sistemi üzrə gecikmiş avtorizasiya prosesi ilə əlaqədar olduğunu bildiriblər. Belə ki, bəzi hallarda bank kartı ilə həyata keçirilmiş gedişlərin ödənişləri dərhal deyil, müəyyən gecikmə ilə kart hesabında əks olunur.

Son günlərdə NFC sistemi üzrə avtorizasiya prosesində təxminən 1 günlük gecikmə qeydə alınıb. Bu səbəbdən sərnişinlər əvvəlki günlərdə həyata keçirdikləri gedişlərin ödənişlərini daha sonrakı saatlarda hesablarında görə bilərlər. Bu, sərnişinin ictimai nəqliyyatdan istifadə etmədiyi halda hesabından yeni vəsait tutulması demək deyil, əksinə, daha əvvəl NFC vasitəsilə həyata keçirilmiş gedişin ödənişidir.