Bakıda tələbələr üçün kirayə mənzil bazarı: Ən ucuz və bahalı ərazilər

Bakıya ali təhsil almaq üçün gələn tələbələrin qarşılaşdığı əsas problemlərdən biri yaşayış yerinin təmin olunmasıdır. Yataqxanalarda yerlərin məhdud olması səbəbindən tələbələr kirayə mənzil axtarışına çıxırlar. Avqustun sonu və sentyabr aylarında tələbatın artması ilə münasib qiymətə ev tapmaq daha da çətinləşir.

Minval.info xəbər verir ki, Azərbaycan Qiymətləndiricilər Cəmiyyətinin sədri Vüqar Oruc, təhsil səviyyəsinin ölkənin inkişafında mühüm rol oynadığını vurğulayaraq, hər il 50 mindən çox abituriyentin tələbə adını qazandığını və onların yaşayış yeri məsələsinin ciddi problemə çevrildiyini bildirib.

Son illərdə daşınmaz əmlak bazarında qiymətlərin artması, kirayə mənzil axtaran tələbələrin işini daha da çətinləşdirir. Metroya yaxın ərazilərdə mənzillərin qiymətləri 600-900 manat arasında dəyişir. Bu səbəbdən tələbələr bir neçə nəfər birlikdə mənzil kirayələməyə üstünlük verirlər. Binəqədi rayonu, Azadlıq prospekti, 9-cu mikrorayon, Nəsimi metrosu ətrafı, Yeni Yasamal, 20 Yanvar və İnşaatçılar metroları ətrafı, Neftçilər, Xalqlar Dostluğu və Qara Qarayev metroları ətrafı nisbətən ucuz ərazilər hesab olunur.