Bakıda qida təhlükəsizliyi böhranı: İki iaşə obyektinin fəaliyyəti dayandırıldı

Bakı şəhərində iki iaşə obyektinin fəaliyyəti müvəqqəti olaraq dayandırılıb. Bu qərar, Azərbaycan Respublikasının Qida Təhlükəsizliyi Agentliyi (AQTA) tərəfindən vətəndaşların müraciətləri əsasında aparılan yoxlamalar nəticəsində qəbul edilib.

Minval.info xəbər verir ki, Nərimanov rayonunda A.Heydərov küçəsi 102G ünvanında yerləşən və fiziki şəxs Əminə Hacıağayeva məxsus iaşə obyekti ilə Səbail rayonunda İ.Əfəndiyev küçəsi, ev 10 ünvanında yerləşən və Rahilə Məmmədzadəyə məxsus unlu məmulatların emalı müəssisəsində plandankənar yoxlamalar keçirilib.

Yoxlamalar zamanı hər iki obyektin qida təhlükəsizliyi qeydiyyatından keçmədən fəaliyyət göstərdiyi və sanitariya-gigiyena qaydalarına riayət etmədiyi aşkar edilib. Obyektlərdə havalandırma sistemlərində problemlər və digər uyğunsuzluqlar da müəyyən olunub. Bu səbəbdən, obyektlərin fəaliyyəti nöqsanlar aradan qaldırılana qədər məhdudlaşdırılıb. Unlu məmulatlar istehsal edən müəssisədən götürülən məhsul nümunələri isə laborator müayinəyə göndərilib.