Bakıda mənzilə yatırım: Sərfəlidirmi?

Bakıda mənzil qiymətlərinin artması ilə bağlı suallar yaranır: aldığımız mənzil həqiqətən sərfəli investisiyadırmı, yoxsa sadəcə yüksək qiymətə daşınmaz əmlak alırıq? Bu sualı cavablandırmaq üçün mənzilin qiyməti ilə onun gətirdiyi kirayə gəlirini müqayisə etmək faydalıdır. Məsələn, 100 min manata alınan mənzil ayda 500 manat kirayə gəliri gətirirsə, illik gəlir 6 min manat, yəni mənzilin qiymətinin 6%-i təşkil edir. Bu halda, qiymətlər və kirayə dəyişməzsə, mənzil təxminən 17 ilə alış qiyməti qədər gəlir gətirə bilər.

Minval.info xəbər verir ki, iqtisadçı Eldəniz Əmirovun fikrincə, praktik yanaşmada mənzilin qiyməti 15 illik kirayə gəlirindən aşağıdırsa, bu, yaxşı investisiya hesab edilə bilər. 15-20 il normal intervaldır, lakin 20 ildən yuxarı qalxdıqca kirayə gəlirliliyi zəifləyir. Məsələn, 100 min manatlıq mənzil ayda 560 manat kirayə gətirirsə, ümumi kirayə gəlirliliyi təxminən 6,7%, 420 manat gətirirsə 5%, 300 manat gətirirsə isə cəmi 3,6% olur.

Bununla yanaşı, mənzil yalnız kirayə gəliri gətirmir, eyni zamanda özü də bahalaşa bilər. İllik inflyasiyanı 6%, mənzilin nominal qiymət artımını isə 10% götürsək, onun real dəyər artımı təxminən 3,8% edir. Yəni 100 min manatlıq mənzil bir ildən sonra 110 min manat olsa da, həmin 10 min manatın hamısı real qazanc deyil. Digər tərəfdən, kirayənin də hamısı qazanc deyil. Mənzilin boş qaldığı dövr, təmir və amortizasiya, vergilər, bina və idarəetmə xərcləri və s. xərclər var. Buna görə investisiya baxımından ümumi kirayəyə deyil, bütün bu xərclər çıxıldıqdan sonra qalan xalis kirayə gəlirinə baxmaq daha doğrudur.

ƏLAQƏLİ

Bunu da oxu

Bakıda kişi ət tikəsindən boğulub öldü

28.08.2026 - 15:23

Məsələn, 100 min manatlıq mənzil ayda 500 manat kirayə gətirirsə, ümumi kirayə gəlirliliyi 6%-dir. Əlavə xərclər üçün şərti olaraq ildə mənzilin dəyərinin 1,5%-ini götürsək, xalis kirayə gəlirliliyi 4,5% qalır. Mənzilin qiyməti də həmin il 10% artarsa, ümumi nominal gəlir təxminən 14,5% edir. 6%-lik inflyasiyanı nəzərə aldıqda real gəlirlilik təxminən 8% olur. Buradakı 1,5% yalnız hesablama üçün götürülmüş şərti xərcdir.

Əlqərəz, mənzil alarkən “Bu mənzil 100 min manatdır, neçə manata kirayə verə bilərəm?” sualını yox, “bu mənzil ayda 500 manat kirayə gətirirsə, investisiya kimi ona maksimum neçə manat verməyə dəyər?” sualını vermək və bu suala dəqiq cavab tapmaq lazımdır. Çünki, əmlakın bazar qiyməti ilə investisiya dəyəri eyni şey deyil.