Bakıda bəzi küçələrdə hərəkət məhdudiyyətləri tətbiq olunacaq

Bakıda aparılan təmir işləri səbəbindən bəzi küçə və yollarda nəqliyyat vasitələrinin hərəkətinə məhdudiyyətlər tətbiq ediləcək. Bu məhdudiyyətlər 1 avqust saat 06:00-dan 3 avqust saat 06:00-dək davam edəcək.

Minval.info xəbər verir ki, Azərbaycan Avtomobil Yolları Dövlət Agentliyi (AAYDA) bu barədə məlumat yayıb. Məlumata görə, Xarici Dairəvi avtomobil yolunun yan yolu (Şamaxı istiqamətində, Fərman Salmanov küçəsindən Əsəd Əhmədov küçəsinə qədər) tam bağlanacaq. Şeyx Şamil küçəsi (H.Seyidbəyli küçəsindən İstiqlaliyyət küçəsinə qədər) və Lermontov küçəsi (Bünyad Sərdarov küçəsindən Şeyx Şamil küçəsinə qədər) də bu müddət ərzində tam bağlanacaq.

Bundan əlavə, Mikayıl Müşfiq küçəsində (Mətbuat prospektindən Parlament prospektinə qədər) 31 iyul saat 20:00-dan 3 avqust saat 06:00-dək hərəkət qismən məhdudlaşdırılacaq. Şıxəli Qurbanov küçəsi (Füzuli küçəsindən Salatın Əsgərova küçəsinə qədər) isə tam bağlanacaq. Sürücülərə alternativ yollar seçmələri və təmir işləri aparılan ərazilərdə quraşdırılmış müvəqqəti yol nişanlarına riayət etmələri tövsiyə olunur.