Bakıda avtobusda yağış sürprizi: Sərnişinlər islandı

Bakıda 7A nömrəli marşrut avtobusunda baş verən texniki nasazlıq nəticəsində sərnişinlərin üzərinə su tökülüb. Hadisə Əhmədlidən Bakı Dəmiryol Vağzalına gedən avtobusda baş verib. Sərnişinlərdən biri sosial şəbəkədə paylaşım edərək, bir saat yarımlıq yolda islanmamaq üçün üstünə paket örtmək məcburiyyətində qaldığını bildirib.

Minval.info xəbər verir ki, “Bakubus”dan verilən məlumata görə, avtobusun soyutma sisteminin drenaj xəttində texniki nasazlıq yaranıb. Sürücü nasazlıq barədə məlumat aldıqdan sonra avtobusun dövriyyəsini tamamlayaraq sərnişinləri son dayanacağa çatdırıb və nəqliyyat vasitəsini texniki baxış və təmir üçün depoya təhvil verib. Hazırda nasazlığın aradan qaldırılması istiqamətində müvafiq işlər aparılır və sərnişindaşıma xidmətində fasilənin yaranmaması üçün nasaz avtobus operativ şəkildə digər nəqliyyat vasitəsi ilə əvəz olunub.