Bakıda avtobusda texniki nasazlıq: Sərnişinə su töküldü

Bu gün Bakıda 7A nömrəli müntəzəm marşrut xətti üzrə hərəkət edən avtobuslardan birində texniki nasazlıq baş verib. Avtobusun soyutma sisteminin drenaj xəttində yaranan problem nəticəsində sərnişinin üzərinə su tökülüb.

Minval.info xəbər verir ki, “BakuBus” MMC-nin mətbuat katibi Əsmər Əliyeva hadisə ilə bağlı açıqlama verib. Onun sözlərinə görə, sürücü nasazlıq barədə məlumat aldıqdan sonra avtobusun dövriyyəsini tamamlayaraq sərnişinləri son dayanacağa çatdırıb və nəqliyyat vasitəsini texniki baxış və təmir üçün depoya təhvil verib. Hazırda nasazlığın aradan qaldırılması istiqamətində müvafiq işlər aparılır və sərnişindaşıma xidmətində fasilə yaranmaması üçün nasaz avtobus operativ şəkildə digər nəqliyyat vasitəsi ilə əvəz olunub.

Hadisə zamanı sərnişin Əhmədlidən Bakı Dəmiryol Vağzalına gedərkən avtobusda pəncərə kənarında əyləşib və tavandan damcılayan sudan qorunmaq üçün aldığı kitabın paketini başının üzərinə tutub.