Bakıda 32 marşrutun hərəkət sxemi dəyişir

Bakıda 32 müntəzəm marşrutun hərəkət sxemi dəyişdirilir. Bu dəyişikliklər Moskva prospekti (kənar yol), Rəşid İsmayılov (Biləcəri enişi) və Natəvan küçələrində aparılacaq təmir işləri ilə əlaqədardır.

Minval.info xəbər verir ki, Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) tərəfindən verilən məlumata görə, bu gün saat 20:00-dan etibarən 2, 7A, 14, 29, 37, 67, 83, 83A, 91, 92, 96, 102, 114A, 114B, 119, 130, 135, 137, 142, 156, 156A, 158, 159, 170, 199, 500, 503, 508, 525A, 525B, 594 və E2 nömrəli marşrutların hərəkət sxemi dəyişdiriləcək.

Məlumata əsasən, avtobusların hərəkəti Moskva prospektində yerləşən tuneldən təşkil ediləcək. Bakı Beynəlxalq Avtovağzal Kompleksi və Biləcəri qəsəbəsinə xidmət göstərən 2, 7A, 14, 29, 37, 67, 83, 83A, 92 və 96 nömrəli marşrutlar Bakı-Sumqayıt şosesi, Sulutəpə yol ötürücüsü, Xocəsən dairəsi, Bakı Beynəlxalq Avtovağzal Kompleksi istiqamətində hərəkət edəcək. 156, 156A, 158, 170, 525A və 525B nömrəli marşrutlar “20 Yanvar” dairəsi və Moskva prospekti (tunel) ilə hərəkət edəcək. 91 nömrəli marşrut isə Rəşid İsmayılov küçəsi, 1-ci döngə, Qabil Süleymanov küçəsi ilə təşkil ediləcək.