Bakıda 3 günlük yağış: Leysan və dolu gözlənilir

Bakıda və bəzi bölgələrdə 7, 8 və 9 sentyabr tarixlərində yağışlı hava şəraiti gözlənilir. Milli Hidrometeorologiya Xidmətinin məlumatına görə, sentyabrın 5-də dağlıq ərazilərdə, 6-sı gündüz isə şimal və qərb rayonlarından başlayaraq 8-i səhərədək bəzi yerlərdə fasilələrlə yağış yağacağı proqnozlaşdırılır. Ayrı-ayrı yerlərdə yağıntıların qısamüddətli leysan xarakterli intensiv olacağı, şimşək çaxacağı və dolu düşəcəyi ehtimal edilir.

Minval.info xəbər verir ki, biomüxtəliflik üzrə ekspert, ekoloq Arzu Mustafayev, iqlim dəyişikliklərinin son dövrlərdə daha qeyri-müəyyən xarakter aldığını bildirib. O, qeyd edib ki, “El-Nino” hadisəsinin gözləniləndən daha güclü formada müşahidə oluna biləcəyi ilə bağlı beynəlxalq xəbərdarlıqlar mövcuddur. Lakin mövcud müşahidələr göstərir ki, Azərbaycan hələlik ciddi iqlim böhranının ağır fəsadları ilə üzləşən ölkələr sırasında deyil.

Ekoloq əlavə edib ki, qarşıdakı dövrdə yayın sonuna xas hava şəraitinin davam etməsi gözlənilir. Axşam saatlarında temperaturun 15-25, gündüz saatlarında isə 30-33 dərəcə arasında dəyişəcəyi ehtimal olunur. Bəzi ərazilərdə yağıntıların düşməsi də gözlənilir. Dağətəyi rayonlarda yağıntıların daha intensiv olması mümkündür. Yüksək dağlıq ərazilərdə, xüsusilə Şərqi Qafqaz silsiləsində sulu qar və dolu kimi atmosfer hadisələrinin müşahidə olunması istisna edilmir.