Bakı və Abşeronda su təchizatı yenilənir

Bakı şəhəri və Abşeron yarımadasında su təchizatı, yağış və tullantı suları sistemlərinin təkmilləşdirilməsi məqsədilə 2026–2035-ci illəri əhatə edən Dövlət Proqramı çərçivəsində mühüm infrastruktur layihələri həyata keçirilir. Bu layihələr Azərbaycan Dövlət Su Ehtiyatları Agentliyi (ADSEA) tərəfindən icra olunur.

Minval.info xəbər verir ki, Dövlət Proqramı çərçivəsində həyata keçirilən əsas layihələrdən biri Müşfiqabad hövzəsi üzrə gətirici kanalizasiya kollektorunun və tullantı sutəmizləyici qurğunun tikintisidir. Bu layihə Xırdalan şəhərində, 28 May, Müşfiqabad, Hökməli və Aşağı Güzdək qəsəbələrində formalaşan tullantı sularının müasir texnologiyalar əsasında təmizlənməsinə və vahid sistem üzrə toplanmasına xidmət edəcək.

Yeni infrastruktur Ceyranbatan Su Anbarının ətrafında qrunt sularının tənzimlənməsinə, subasma risklərinin azaldılmasına, sanitar-gigiyenik şəraitin yaxşılaşdırılmasına və ərazidə ekoloji təhlükəsizliyin gücləndirilməsinə imkan yaradacaq. Layihənin 2028-ci ildə tamamlanması planlaşdırılır və bu zaman gətirici kanalizasiya kollektoru, tullantı sutəmizləyici qurğu, texnoloji hovuzlar, mühəndis sistemləri və yardımçı obyektlər vahid və dayanıqlı infrastruktur sistemi kimi fəaliyyət göstərəcək.