Bakı metrosunda M7 ekspres marşrutu işə düşür

Metro xətlərinin ayrılması ilə əlaqədar sərnişinlərin ictimai nəqliyyata əlçatanlığının artırılması məqsədilə yeni ekspres marşrut xətti təşkil edilir. Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən məlumat verilib. Bildirilib ki, metronun ’20 Yanvar’ stansiyasından ‘Qara Qarayev’, ‘Neftçilər’, ‘Xalqlar Dostluğu’, ‘Əhmədli’ və ‘Həzi Aslanov’ stansiyaları istiqamətində artan sərnişin tələbatının qarşılanması üçün sentyabrın 6-dan M7 nömrəli ekspres marşrutu fəaliyyətə başlayacaq.

Minval.info xəbər verir ki, avtobusların ’20 Yanvar’ metrostansiyasındakı dayanacağı Rövşən Cəfərov küçəsi, ‘Velotrek’ adlanan ərazinin qarşısı, ‘Həzi Aslanov’ metrostansiyasında isə Məhəmməd Hadi küçəsi, metronun qarşısı təyin edilib. Avtobusların hərəkəti metronun iş rejiminə uyğunlaşdırılaraq saat 06:00-dan 00:00-dək təşkil ediləcək.