Bağçada psixotrop maddə: Komitə araşdırma tələb edir

Ailə, Qadın və Uşaq Problemləri üzrə Dövlət Komitəsi Bakının Yasamal rayonunda yerləşən 98 saylı uşaq bağçasında təhsil alan uşağın qanında psixotrop maddə aşkarlanması iddiası ilə əlaqədar Daxili İşlər Nazirliyinə və Baş Prokurorluğa rəsmi müraciət edib.

Minval.info xəbər verir ki, azyaşlının səhhətində və davranışında mənfi dəyişikliklərin müşahidə edilməsi, habelə tibbi müayinələr zamanı orqanizmində sağlamlığa zərərli maddələrin aşkarlanması ilə bağlı yayılan məlumatlar dərhal nəzarətə götürülüb. Azyaşlının valideynləri Dövlət Komitəsinə dəvət olunaraq, məsələ ilə bağlı ətraflı məlumat alınıb.

Faktın obyektiv və hərtərəfli araşdırılması, eləcə də azyaşlının hüquq və mənafelərinin qorunması məqsədilə Dövlət Komitəsi tərəfindən aidiyyəti dövlət qurumlarına rəsmi müraciətlər ünvanlanıb. Hazırda müvafiq dövlət qurumları tərəfindən zəruri tədbirlər davam etdirilir və araşdırmanın nəticələrinə əsasən qanunvericiliyə uyğun tədbirlər görüləcək.