Azərbaycanın sağlamlıq turizmi Qazaxıstanda tanıdıldı

Qazaxıstanın paytaxtı Astanada Azərbaycan Həmkarlar İttifaqları Konfederasiyasının (AHİK) nümayəndə heyəti Azərbaycanın turizm potensialını təqdim edib. Görüşdə Qazaxıstanın turizm şirkətlərinin nümayəndələrinə Azərbaycanın turizm, xüsusilə sağlamlıq turizmi sahəsindəki imkanları barədə ətraflı məlumat verilib.

Minval.info xəbər verir ki, tədbirdə AHİK-in sağlamlıq mərkəzləri, müalicə və istirahət üçün yaradılmış şərait, müasir tibbi avadanlıqlar və təbii müalicə üsulları haqqında təqdimatlar keçirilib. İştirakçılar “Kurort” Turizm İnformasiya Mərkəzi, yollayışların elektron təqdimatı və “e-ahik” Elektron Rezervasiya platforması ilə də tanış olublar.

Görüş zamanı Azərbaycanın turizm imkanlarının Qazaxıstanda daha geniş tanıdılması, turizm şirkətləri ilə əlaqələrin inkişaf etdirilməsi və bu sahədə əməkdaşlığın perspektivləri müzakirə edilib. Tədbirdə həmçinin Azərbaycanın turizm potensialını əks etdirən videomateriallar nümayiş etdirilib və iştirakçıların sualları cavablandırılıb.