Azərbaycan yol polisləri Belarusda birinci oldu

Belarus Respublikasının Mogilyov şəhərində keçirilən yol-patrul xidməti əməkdaşları arasında peşəkar ustalıq və çoxnövçülük üzrə 25-ci yubiley müsabiqəsində Azərbaycan polisləri böyük uğur qazanıblar. Bakı Şəhər Baş Polis İdarəsi Dövlət Yol Polisi İdarəsinin baş inspektorları, polis mayoru Emil İbrahimov və polis baş leytenantı Nicat Əliyev, müsabiqədə iştirak edən Belarus və Rusiyadan olan yol-patrul xidməti əməkdaşları arasında birinci yerə layiq görülüblər.

Minval.info xəbər verir ki, yarış iştirakçılarının peşə hazırlığı bir neçə istiqamət üzrə qiymətləndirilib. Bu istiqamətlər arasında yol hərəkətinin tənzimlənməsi və nizamlanması, yol nəqliyyat hadisələri zamanı ilkin tibbi yardım bacarıqları, atəş hazırlığı, silahla davranış və təhlükəsizlik qaydaları, praktiki atıcılıq və fiziki hazırlıq mərhələləri yer alıb. Bütün mərhələlərdə yüksək nəticə göstərən Emil İbrahimov və Nicat Əliyev yarışın qalibi olublar.

Qaliblərin təltifetmə mərasimində Belarus Daxili İşlər Nazirliyinin rəhbər şəxsləri iştirak ediblər.