Azərbaycan Avropa Siyasi Birliyinin qəbul etdiyi üç sənədə qoşulmayıb

Noyabrın 12-də Dublində “Avropa Siyasi Birliyi” (EPC) Zirvə toplantısı keçirilib. Bu toplantı çərçivəsində bəzi ölkələrin təşəbbüsü ilə “Avropa təhlükəsizliyinin əsas prinsipləri haqqında Bəyannamə”, “Miqrasiya haqqında Bəyanat” və “Narkotiklərə qarşı Avropa Koalisiyasının Bəyanatı” qəbul edilib.

Publika.az-a Xarici İşlər Nazirliyindən verilən məlumata görə, Azərbaycan bu sənədlərə qoşulmayıb. EPC-nin məqsədi ölkələr arasında qarşılıqlı etimad və əməkdaşlığın təşviq edilməsidir. Bu qeyri-rəsmi dialoq platforması ümumi maraq doğuran məsələlər ətrafında fikir mübadiləsi aparmağa və ortaq çağırışlar üzərində müzakirələrə imkan yaradır.

Ölkəmizin EPC-də iştirakının əsas məqsədi ümumi maraq doğuran məsələləri müzakirə etmək və iştirakçı ölkələrlə əməkdaşlıq imkanlarını genişləndirməkdir. Lakin Azərbaycan tərəfi əlavə hüquqi və siyasi öhdəlik yaradan bu sənədlərə qoşulmaqdan imtina edib.