AZAL Braziliya təyyarələri ilə donanmasını genişləndirir

Azərbaycan Hava Yolları (AZAL) təyyarə parkını genişləndirmək məqsədilə Braziliya istehsalı olan yeni təyyarələrin alınması imkanlarını dəyərləndirir. Bu məsələ AZAL-ın baş direktoru Samir Rzayev və Braziliyanın Azərbaycandakı səfiri Bernard Jorg Leopold de Garcia Klingl arasında keçirilən görüşdə müzakirə olunub.

Minval.info xəbər verir ki, görüş zamanı AZAL-ın təyyarə parkının yenilənməsi, marşrut şəbəkəsinin genişləndirilməsi və Azərbaycanla Braziliya arasında aviasiya sahəsində əməkdaşlığın inkişaf perspektivləri ətrafında fikir mübadiləsi aparılıb. Həmçinin, Braziliya aviasiya sənayesinin əsas istehsalçılarından olan “Embraer” şirkətinin təyyarələri də müzakirə mövzusu olub.

Qeyd edək ki, hazırda AZAL-ın təyyarə parkında Braziliyanın “Embraer” şirkətinin istehsalı olan 7 təyyarə fəaliyyət göstərir.