Azad edilmiş 2048 hektar ərazi minalardan təmizləndi

Ötən həftə ərzində azad edilmiş ərazilərdə geniş miqyaslı minatəmizləmə əməliyyatları həyata keçirilib. Bu müddət ərzində 2048,7 hektar ərazi minalardan təmizlənib.

Minval.info xəbər verir ki, avqustun 24-dən 30-dək olan dövrdə 29 tank əleyhinə, 161 piyada əleyhinə mina və 689 partlamamış hərbi sursat (PHS) aşkarlanaraq zərərsizləşdirilib. Bu əməliyyatlar Azərbaycan Minatəmizləmə Agentliyi (ANAMA), Müdafiə Nazirliyi, Fövqəladə Hallar Nazirliyi (FHN), beş yerli təşkilat və bir qeyri-hökumət təşkilatı tərəfindən Tərtər, Ağdərə, Kəlbəcər, Ağdam, Xocalı, Xankəndi, Şuşa, Xocavənd, Laçın, Füzuli, Cəbrayıl, Qubadlı və Zəngilan ərazilərində, həmçinin Qazax rayonunun işğaldan azad edilmiş Bağanıs Ayrım, Aşağı Əskipara, Xeyrımlı və Qızılhacılı kəndlərində həyata keçirilib.