Azərbaycanın iki nüfuzlu diaspor təşkilatı birləşir

Dünya Azərbaycanlılarının Milli Birlik Təşkilatı ilə Dünya Azərbaycanlıları Assambleyasının birləşmə qurultayı bu ilin sentyabrında keçiriləcək.

Minval.İnfo-nun məlumatına görə, adı çəkilən təşkilatlar birləşmək barədə qərar qəbul ediblər.

Bu qərar Dünya Azərbaycanlılarının Milli Birlik Təşkilatının rəhbəri Cavad Derəxti ilə Dünya Azərbaycanlıları Assambleyasının rəhbəri Rəşad Quliyev arasında keçirilən görüşdə qəbul olunub.

İki nüfuzlu diaspor təşkilatı rəhbərinin görüşündə Azərbaycan diaspor təşkilatlarının fəaliyyəti, ölkəmizin dünyada tanıdılması və haqq səsinin beynəlxaq ictimaiyyətə çatdırılmasına dair müzakirələr aparılıb, sözügedən məsələlərin həlli ilə bağlı gələcək planlardan danışılıb.

Müzakirənin sonunda iki təşkilatın birləşməsi barədə razılaşma əldə olunub və birləşmə qurultayının bu ilin sentyabr ayında Almaniyanın Köln şəhərində keçirilməsi qərara alınıb.

Dünya Azərbaycanlıları Assambleyasından verilən məlumata görə, müxtəlif ölkələrdə fəaliyyət göstərən bir neçə diaspor təşkilatının da birlik qurultayını dəstəkləyəcəkləri gözlənilir. Artıq Beynəlxalq Diaspor Mərkəzi və Yaxın Şərq Azərbaycanlıları Konqresi də birləşmə ideyasına dəstək verəcəklərini bəyan ediblər.

Qeyd edək ki, Dünya Azərbaycanlılarının Milli Birlik Təşkilatının mərkəzi İsveç Krallığının Malmö şəhərində, Dünya Azərbaycanlıları Assambleyasınınbaş ofisi isə Almaniya Federativ Respublikasının Köln şəhərində yerləşir.

Minval.İnfo