Azərbaycanda yerli toxum istehsalı genişlənir

Azərbaycanda sertifikatlı yerli toxum istehsalının artırılması və özəl sektorun toxumçuluq sahəsində rolunun genişləndirilməsi nəzərdə tutulur. Kənd təsərrüfatı nazirinin müavini İlhamə Qədimova bu barədə mətbuat konfransında məlumat verib. Minval.info xəbər verir ki, yeni qəbul olunan “Toxumçuluq haqqında” Qanun çərçivəsində özəl şirkətlərin bu sahədə fəaliyyət imkanlarının artırılması əsas istiqamətlərdəndir.

İlhamə Qədimova bildirib ki, məhsuldarlığın yüksəldilməsi üçün keyfiyyətli toxumdan istifadə mühüm əhəmiyyət daşıyır. Bu məqsədlə fermerlərin sertifikatlı toxuma çıxışının genişləndirilməsi, yerli toxum istehsalının artırılması və yerli məhsula etimadın gücləndirilməsi planlaşdırılır. Nazir müavini əlavə edib ki, bazarda həm yerli, həm də idxal toxumlarından istifadə edilir. Yeni yanaşma toxum istehsalının artırılması ilə yanaşı, onların keyfiyyətinə nəzarətin gücləndirilməsini və monitorinq mexanizmlərinin genişləndirilməsini də əhatə edir.