Azərbaycanda ovuc içi ilə ödəniş dövrü başladı

Azərbaycanda artıq ödəniş etmək üçün bank kartı və ya smartfonu çıxarmağa ehtiyac qalmayıb. Yeni tətbiq olunan ovuc içi ilə ödəniş texnologiyası bu sahədə inqilabi bir addım kimi qiymətləndirilir. Bu sistem, ödənişlərin rahat və sürətli şəkildə həyata keçirilməsinə imkan verir.

Minval.info xəbər verir ki, ovuc içi ilə ödənişin əsas üstünlüyü rahatlıq və təhlükəsizlikdir. İstifadəçilər kartlarını itirmək və ya unutmaq kimi problemlərlə üzləşmədən, bir neçə saniyə ərzində ödənişlərini həyata keçirə bilərlər. Lakin bu yeni texnologiyanın tətbiqi ilə bağlı bəzi suallar da yaranır. İnsanlar biometrik məlumatlarını belə bir sistemə etibar etməyə hazırdırmı?

Azərbaycan İnformasiya və Kommunikasiya Texnologiyaları Sənayesi Assosiasiyasının sədri Elvin Abbasov bildirib ki, “PalmPay” kimi ovuc içi ilə ödəniş texnologiyaları rəqəmsal ödəniş ekosistemində yeni bir mərhələ açsa da, yaxın və orta müddətli dövrdə bank kartlarına olan ehtiyacı tamamilə aradan qaldırmayacaq. Bu sistem, ənənəvi kartları sıradan çıxarmaqdan ziyadə, istifadəçilərə daha sürətli və alternativ bir ödəniş kanalı təqdim edir. Ovuc içi ödənişlərin kütləviləşməsi üçün ölkə üzrə bütün ticarət obyektlərində xüsusi biometrik terminalların quraşdırılması tələb olunur ki, bu da müəyyən zaman aparacaq.

ƏLAQƏLİ

Bunu da oxu

Bakıda IRONMAN yarışı üçün yollar bağlanır

04.09.2026 - 19:21

Elvin Abbasov əlavə edib ki, cəmiyyətin bu yeni texnologiyaya güvənməsi və adaptasiya prosesi tədricən tətbiq olunan maarifləndirmə və təhlükəsizlik amillərindən asılı olacaq. Dəri altındakı damar naxışlarının gözlə görünməməsi, kopyalanmasının imkansızlığı və canlılıq testi kimi qabaqcıl müdafiə mexanizmləri bu üsulu PİN kodlu plastik kartlardan daha təhlükəsiz edir. İstifadəçilərə biometrik verilənlərin foto kimi deyil, şifrələnmiş riyazi kodlar şəklində qorunduğu aydın izah edildikcə və xidmətin yaratdığı komfort hiss olunduqca, ovuc içi ödənişlərə olan ictimai etibar kəskin şəkildə artacaq.