Ağasif Məmmədovun məhkəməsi: Ütü ilə zorakılıq qalmaqalı

Ağasif Məmmədovun həyat yoldaşına qarşı törətdiyi zorakılıq hadisəsi ilə bağlı məhkəmə prosesi başa çatıb. Qaradağ Rayon Məhkəməsində hakim Emin Fətəliyevin sədrliyi ilə keçirilən iclasda Ağasif Məmmədovun cinayət məsuliyyətindən azad edilməsi qərara alınıb. Hadisə bu ilin əvvəlində Lökbatan qəsəbəsində baş verib. Ailə-məişət zəminində yaranan mübahisə zamanı Ağasif Məmmədov həyat yoldaşı Günayə Məmmədovaya əlləri ilə zərbələr endirib və daha sonra ütü ilə başına vurub. Nəticədə Günayə Məmmədova müxtəlif bədən xəsarətləri alıb.

Minval.info xəbər verir ki, məhkəmədə Ağasif Məmmədov özünü təqsirli bilib və hadisənin səbəblərini izah edib. O, həyat yoldaşının gizli şəkildə telefonla danışmasını əsas problem kimi göstərib. Mübahisə zamanı içkili olduğunu etiraf edən Ağasif Məmmədov, həyat yoldaşının telefonla kiminlə danışdığını öyrənmək istədiyini, lakin cavab ala bilmədiyini bildirib. Bu səbəbdən aralarında mübahisə yaranıb və nəticədə zorakılıq hadisəsi baş verib.

Məhkəmə zamanı Ağasif Məmmədov və həyat yoldaşı arasında barışıq əldə edildiyi və artıq birlikdə yaşamadıqları məlum olub. Təqsirləndirilən şəxs, zərərçəkmiş şəxsin ona qarşı heç bir şikayət və tələbinin olmadığını qeyd edib.