Abşeronda kanalizasiya suları yola axır: Sakinlər narazı

Abşeron rayonunun Məmmədli qəsəbəsində kanalizasiya sularının yola axması ciddi narazılıq doğurub. Qəsəbənin Heydər Əliyev prospektinin bəzi hissələrində asfalt örtüyünün dağılması və yolun bərbad vəziyyəti sakinlərin narahatlığına səbəb olub. Yolda yaranan çalalar avtomobillərin zədələnməsinə və tıxacların yaranmasına gətirib çıxarır.

Minval.info xəbər verir ki, problemi daha da ağırlaşdıran məqam kanalizasiya sularının yola axmasıdır. Çirkab suların toplanması nəticəsində ərazidə gölməçələr yaranır, palçıq artır və ətrafa kəskin üfunət yayılır. Sakinlər bildirirlər ki, kanalizasiya xəttində yaranan nasazlıqlar səbəbindən ərazi dəfələrlə qazılıb və təmir edilib, lakin problem yenidən təkrarlanır.