35 minə yaxın təhsil işçisi əks-göstəriş sertifikatı alıb

“Vaksinasiya prosesi başlanandan bəri 35 min nəfərə yaxın təhsil işçisi əks-göstərişlə bağlı arayış təqdim edib. Allergik rinit, diabet xəstəliyi olanlar da poliklinikalardan belə arayış alıblar. Avqustun 9-dan isə Səhiyyə Nazirliyi və TƏBİB tərəfindən vahid “Əks-göstəriş sertifikatı” hazırlanıb. Artıq həmin əməkdaşlarımız qeyd olunan sertifikatı almalıdır”. 

“Minval.info” “Qafqazinfo”a istinadən xəbər verir ki, bu barədə təhsil nazirinin müavini Rüstəm Ağayev bildirib.

O qeyd edib ki, əgər həqiqi əks-göstəriş yoxdursa, hər kəs peyvənd olunmalıdır:

“Düşünürəm ki, artıq həmin arayışı olanların əksəriyyəti bu sertifikatı ala bilməyəcəklər. Onlar subyektiv olaraq hansısa xəstəliklərinin əks-göstəriş olduğunu fikirləşirlər. Lakin onlara obyektiv formada sertifikat veriləcək. Əgər həqiqi əks-göstəriş yoxdursa, müəllimlər sentyabrın 15-dək heç olmasa 1 doza vaksin vurdursunlar”.