Aparıcı Zülfiyyə Bayramova bir neçə gündür ATV və İctimai Televiziyanın aparıcıları – Mətanət Əliverdiyeva ilə Azər Aydəmir və Tural Yusifov arasında yaşanan qalmaqala münasibət bildirib.

Minval.info xəbər verir ki, Zülfiyyə instaqram hesabında həmkarlarını bir-birinə dəstək olmağa çağırıb:

“Nə olar, etməyin, eləməyin. Çox az qalmışıq. Biz də bir-birimizi yesək, heç nə qalmayacaq bizdən. Həyat çox qısadır, gəlin, səhvimizlə, doğrumuzla bir-birimizin yanında olaq. Bizim bizdən başqa müdafiəçimiz yoxdur. Hər birimiz çörəyimizi yüz əzab-əziyyətlə qazanırıq. Sevin bir-birinizi, ölümün qapımızı nə vaxt döyəcəyini, başımızın üstünü haçan kəsdirəcəyini bilmirik. Gəlin, elə edək ki, sonda peşman olmayaq. Mən sizi sevirəm”.

Qeyd edək ki, M.Əliverdiyeva proqramına qonaq olan müğənni Manaf Ağayevə “Qadın səni hansı həddə çatdırmalıdır ki, ona əl qaldırasan” sualını ünvanlayıb.

Manaf isə “Belə göründüyümə baxma, o vəziyyətə dözən deyiləm. Bir sözə görə baş kəsərəm” deyərək diqqəti üzərinə çəkmişdi.

Bundan sonra A. Aydəmir sosial şəbəkədə ad çəkməsə də, həmkarı Mətanət Əliverdiyevanı qadına şiddətlə bağlı ifadələrini tənqid etmişdi.