Azərbaycanda istilər nə vaxta qədər davam edəcək? – Ekspertdən açıqlama

Bu il Azərbaycanda yay mövsümü əvvəlki illərə nisbətən daha gec başladı. İyun ayı sərin və yağışlı keçdiyi üçün yay istilərinin oktyabra qədər davam etməsi ehtimalı var.

Minval.info xəbər verir ki, “Səma və Eko” Sosial İqtisadi İnkişafa Yardım İctimai Birliyinin sədri İradə Həsənova, yay istilərinin bu il gecikdiyini və bunun iqlim dəyişikliyi ilə əlaqəli olduğunu bildirib. Son illərdə qlobal iqlim dəyişikliyi fəsillərin başlanğıc və bitmə tarixlərində dəyişikliklərə səbəb olub.

Avqust ayının ən isti dövr olması gözlənilir. Aran rayonları və Abşeron yarımadasında temperaturun iqlim normasından yüksək olacağı və bəzi günlərdə 40 dərəcəyə yaxınlaşacağı proqnozlaşdırılır. Dağlıq ərazilərdə isə qısamüddətli leysan yağışları, şimşək və dolu halları gözlənilir.

ƏLAQƏLİ

Bunu da oxu

Azərbaycan və Gürcüstan dəmir yolu sərhədində sürət rekordunu qırmağa hazırlaşır!

03.08.2026 - 14:01

Ekoloq qeyd edib ki, sentyabr ayında da havanın temperaturu normadan yüksək ola bilər və bu, isti hava şəraitinin payızın ilk həftələrində də davam etməsinə səbəb ola bilər. Lakin oktyabr ayının hava şəraitini dəqiq proqnozlaşdırmaq hələ mümkün deyil.

Son illərdə təkcə temperatur deyil, yağıntıların paylanması da dəyişib. Quraqlıq dövrlərindən sonra intensiv yağışlar, dolu və sel hadisələri daha tez-tez baş verir. Bu dəyişikliklər kənd təsərrüfatı və su ehtiyatlarına təsir edir. Yayın gec başlaması onun uzanacağı ehtimalını artırsa da, oktyabra qədər davam edəcəyini demək elmi əsaslandırılmış proqnoz deyil. Vətəndaşlara rəsmi meteoroloji proqnozları izləmələri tövsiyə olunur.