Xəzər üçün vahid bioresurs məlumat bazası təklifi

Xəzər dənizinin su bioresursları ilə bağlı məlumatların vahid bazada toplanması məsələsi Rusiya, Azərbaycan, Qazaxıstan, İran və Türkmənistan tərəfindən müzakirə edilir. Bu təşəbbüs Sankt-Peterburqda keçirilən Beynəlxalq Balıq Sənayesi Forumunda irəli sürülüb.

Minval.info xəbər verir ki, Rusiya Balıqçılıq Agentliyinin rəhbər müavini Vasili Sokolov, Xəzərin su bioresurslarının idarə olunması üzrə hökumətlərarası beştərəfli komissiya çərçivəsində ortaq məlumat bazasının yaradılmasını təklif edib. Təşəbbüsün əsas məqsədi Xəzəryanı ölkələrin topladığı məlumatları qarşılıqlı şəkildə paylaşması və dənizin ekoloji vəziyyəti barədə daha dolğun məlumat əldə edilməsidir.

Xəzərdə bioloji sərhədlərin olmaması bu istiqamətdə birgə fəaliyyətin əhəmiyyətini artırır. Xəzəryanı dövlətlər, həmçinin dənizin ümumi akvatoriyası üçün vahid balıqçılıq qaydalarının hazırlanmasını da nəzərdə tuturlar. Bu qaydalar su bioresurslarından daha səmərəli istifadəyə və balıq ehtiyatlarının qorunması tədbirlərinin gücləndirilməsinə imkan verəcəkdir.

ƏLAQƏLİ

Bunu da oxu

Ekspres avtobuslar bir gündə rekord vurdu

17.09.2026 - 18:37

Xəzərin su bioresurslarının qorunması və birgə idarə olunması üzrə komissiya 2014-cü ildə Həştərxanda imzalanmış saziş əsasında yaradılıb və 2016-cı ildə ratifikasiya edilərək qüvvəyə minib. Komissiyanın ilk sessiyası isə 2017-ci ilin noyabrında Bakıda keçirilib. Hazırda Xəzər dənizinin ən qiymətli bioresurslarından hesab olunan nərə balıqlarının ovlanmasına tam qadağa qüvvədədir.