Xəzər dənizi sahildən 12 km çəkilə bilər

Xəzər dənizinin səviyyəsinin azalması ilə bağlı ciddi xəbərdarlıq edilib. Belə ki, dəniz sahildən 12 kilometrədək uzaqlaşa bilər. Bu barədə Milli Məclisin deputatı Sadiq Qurbanov “Bakı İqlim Fəaliyyəti Həftəsi -2026” çərçivəsində keçirilən “Daxili su hövzələrində iqlim dəyişikliyi çağırışları: Xəzər dənizi nümunəsi” adlı müzakirələr zamanı bildirib.

Minval.info xəbər verir ki, deputat Xəzərin gələcəyinə dair birgə fəaliyyət proqramlarının hazırlanmasının vacibliyini vurğulayıb. O qeyd edib ki, dünyada hidrometeoroloji proseslərin kəskinləşdiyi və iqlim dəyişkənliyinin artdığı bir dövrdə Xəzərin elmi tədqiqi xüsusi əhəmiyyət kəsb edir.

Sadiq Qurbanov əlavə edib ki, 2007-2025-ci illərdə Azərbaycanda orta çoxillik temperatur normaya nisbətən 1.3 dərəcə artıb. 2025-ci ildə isə bu artım 1.8 dərəcə təşkil edib. Xəzərin səviyyəsinin gələcək dəyişməsi ilə bağlı elmi proqnozlar da xüsusi diqqət tələb edir. Əgər su səviyyəsinin azalması davam edərsə, Nabran-Şabran zonasında dəniz sahildən 4-5 kilometr, Sanqaçal-Ələt zonasında 10-12 kilometr, Lənkəran-Astara zonasında isə 2-3 kilometr uzaqlaşa bilər.