Vanlı Kara Haydarın milyonluq qızılları araşdırılır

Türkiyədə ‘Vanlı Kara Haydar’ adı ilə tanınan Mehmet Fatih Tançalanın sosial media paylaşımlarına görə istintaq başladılıb. Van Baş Prokurorluğunun qərarı ilə Tançalan Türkiyə Cinayət Məcəlləsinin 301-ci maddəsi üzrə araşdırmaya cəlb edilib. Onun paylaşımlarında Türkiyə dövlətinin, türk millətinin və dövlət qurumlarının təhqir edildiyi iddia olunur.

Minval.info xəbər verir ki, Tançalan gecə saatlarında Vanın Muradiye rayonundakı evində keçirilən əməliyyat zamanı saxlanılıb. Onun toyunda taxılan külli miqdarda qızılların mənşəyi ilə bağlı da maliyyə araşdırması başladılıb və məsələ MASAK-a yönləndirilib. Məlumata görə, Tançalanın daha əvvəl 25 cinayət hadisəsi üzrə qeydiyyatda olduğu müəyyənləşdirilib. Onunla bağlı hüquqi və maliyyə araşdırmaları davam edir.