Türk dövlətləri üçün vahid himn təklifi irəli sürüldü

Azərbaycan Mətbuat Şurasının sədri Rəşad Məcid, Türk Dövlətləri Təşkilatının (TDT) öz himninin yaradılması təklifini irəli sürüb. O, bu fikrini sosial şəbəkə hesabında paylaşaraq, TDT-nin tədbirlərində ev sahibi ölkənin himni ilə yanaşı, təşkilatın öz himninin də səsləndirilməsinin əhəmiyyətini vurğulayıb.

Minval.info xəbər verir ki, Rəşad Məcid, Türk dünyasından şair və bəstəkarların iştirakı ilə müsabiqə keçirilməsini təklif edib. O, belə bir himnin yaradılmasının Türk Dövlətləri Təşkilatının tədbirlərində xüsusi bir atmosfer yaradacağını və bu himnin bütün Türk dünyası tərəfindən sevilərək oxunacağını bildirib.

Rəşad Məcidin sözlərinə görə, bu təşəbbüs Türk dünyasının yaradıcı insanları arasında xoş rəqabətə səbəb ola bilər və nəticədə möhtəşəm musiqi və təsirli sözlərdən ibarət bir himn ortaya çıxa bilər.