Paytaxtın Yeni Yasamal 2 adlanan ərazisində binalarda aparılan təmir işləri , bina 4 və 5 –də yaşayan sakinləri su problemi ilə üz-üzə qoyub. Baku.Tv-nin “Xəbər” buraxılışında yayımlanan sujetdə qeyd olunur ki, burada yaşayanlar təmir işləri başlayana qədər su ehtiyatalarını binanın damına yerləşdirdikləri su çənləri ilə ödəyiblər. Təmir başlayandan sonra isə həmin sakinlərə 24 saatlıq su veriləcək deyərək çənləri yığışdırıblar.

“Gün ərzində 2 saat səhər 2 saat axşam su verirlər. Evdə azyaşlı uşaqlar var, qocalar var, namaz qılanlar var… Belə olmaz axı!” -Sakin

“Əvvəl çənlərimiz var idi, rahat idik. İndi təmir ilə əlaqədar onları da yığışdırıblar. Bizə deyirdilər ki, 24 saat su veriləcək, amma elə olmadı.” – Sakin

Binaların fasiləsiz su ilə təmin olunması üçün sakinlər məsul qurumlara müraciətlər etsələr də, vəziyyətdə dəyişiklik olmayıb.

“Dəfələrlə müraciətlər etmişik. Heç kim maraqlanmır. Azərsu ASC-yə də demişik, Yasamal Rayon icra Hakimiyyətinə də” -Sakin

Azərsu ASC-nin mətbuat xidmətinin rəhbəri Anar Cəbrayıllı isə sözügedən binalarda fasiləsiz su təchizatının olması üçün texniki imkanların olmadığını bildirir.

“Hazırda həmin binalarda səhər 3 saat , axşam 3 saat su verilir. Gələcəkdə texniki problemlər aradan qaldırılarq problem öz həllini tapacaq”

Sakinlər də, biz də həmin gələcəyin elə də uzaqda olmamasına ümid edirik.