“Təki hamının ailəsi müğənnininki kimi qeyrətli olsun” – Fatimə və Roza əsəbiləşdi

Son günlər şou-biznesdə xanım ifaçılarla kişilər arasında qalmaqal səngimək bilmir.

Axşam.az xəbər verir ki, müğənni Nadir Qafarzadə, klarnet ifaçısı Hüseyn Məhəmmədoğlu, xanəndə Eldəniz Məmmədovun xanımların ünvanına təhqiredici fikirlər səsləndirməsinə bu dəfə rəqqasə Fatimə Fətəliyeva və müğənni Roza Zərgərli etiraz edib.

Roza açıqlamasında bildirib ki, Nadir hər zaman ona “bacı” deyə, müraciət edib:

“Nadirlə çox yaxın olmuşuq, Hüseyn və Eldənizlə münasibətimiz yaxşıdır. Nadir dəfələrlə mənə “bacı” deyə müraciət edib. Hüseyn isə hətta mənə “böyük qardaşım” deyə müraciət edib. İnanmıram ki, həmin fikirləri bütün ifaçılara şamil ediblər. Hamıya şamil olunubsa, çox nahaq.

Biz qadın müğənnilər də əks cinsdən olan ifaçılara başqa söz deyək? Təki hamının ailəsi sənət adamlarının ailəsi kimi qeyrətli olsun. Çünki məşhurların ailəsi daha qapalı və diqqətli olurlar. Mənim uşaqlarım suyu da üfürə-üfürə içir ki, nəsə söz çıxar. Bizə “anamsan, bacımsan” deyib, arxada həmin fikri deməməlidirlər. Kübar danışmaq lazımdır”.

Fatimə isə ifaçıların kamera qarşısında saxtakarlıq nümayiş etdirdiyini söyləyib:

“Onlar bizlə görüşəndə bacı deyirlər. Kamera görən kimi hər şeyi unudur, hamını eyni edirlər. Roza efirə çıxırsa, canı ağrısa da, xəstə olsa da, işidir tamaşaçı qarşısında gülsün. O deməkdir, Roza arsızdır? Lap digər xanım sənətçilərimiz, rəqqasələrimiz var ki, onlara bunları demək günahdır. Səhər həkimə getmişəm, canımda ağrılar var. Amma baxanda deyərsiz xəstədir?

Antalyada Nadirin ailəsi ilə bir yerdə qalmışıq. Başa düşürəm ki, şou-biznesdə elələri var yanlış hərəkətlər edir. İnstaqramda elə açıq olub ki, hərdən baxanda telefonu çırpmaq istəyirəm. Onlara görə mənə də yaxşı baxmırlar”.

Qeyd edək ki, N.Qafarzadə məşhur xanımların ünvanına “Onlar xanım yox, fahişədirlər” sözlərini, H.Məhəmmədoğlu isə “Əxlaqsızdırlar” ifadəsini demişdi.