Şimali Koreya Yapon dənizinə raketlər buraxdı

Şimali Koreya Yapon dənizi istiqamətində bir neçə qısa mənzilli ballistik raket buraxıb. Minval.info xəbər verir ki, Cənubi Koreyanın Birləşmiş Qərargah Rəisləri Komitəsinin məlumatına əsasən, buraxılışlar şənbə günü yerli vaxtla saat 05:20-də Vonsan bölgəsindən həyata keçirilib. Raketlər təxminən 250 kilometr məsafə qət etdikdən sonra dənizə düşüb.

Cənubi Koreya və ABŞ hərbçiləri raketlərin texniki göstəricilərini araşdırır. İlkin ehtimallara görə, buraxılışlar “Hvason-11” seriyalı ballistik raketləri və 600 millimetrlik reaktiv yaylım atəşi sistemlərinin mərmilərini əhatə edib. Hadisə Cənubi Koreya, ABŞ və Yaponiyanın birgə hərbi təlimlərinin başa çatmasından cəmi bir gün sonra baş verib.