Seda Sayan reklam anlaşmaları ilə rekord qırdı!

Türkiyənin məşhur müğənnisi və aparıcısı Seda Sayan, bu dəfə qazancı ilə diqqət mərkəzinə düşüb. 63 yaşlı sənətçi, dörd fərqli marka ilə reklam anlaşması imzalayaraq, hər bir müqavilədən illik 50 milyon lirə qazanacaq. Bu isə ümumilikdə 200 milyon lirə, yəni 7 milyon manatdan çox gəlir deməkdir.

Minval.info xəbər verir ki, Seda Sayanın reklam layihələrindən biri artıq təqdim olunub. O, “ÜçDörtBeş All Star” adlı rəqəmsal təhsil platformasının reklamında çəkilib. Reklamda Sayan, YKS-yə hazırlaşan şagird obrazında çıxış edərək, Türkiyədə maraq doğurub.

Sayanın təhsil platforması ilə əməkdaşlığı ənənəvi reklam formatından fərqli olaraq, onun illərdir tanınan ifadələri və ekran obrazı üzərində qurulub. Türkiyə mətbuatında yayılan xəbərlərə görə, digər üç marka ilə bağlı reklamların da yaxın zamanda yayımlanması gözlənilir. Son dövrlərdə Sayanın televiziya layihələrindən çox rəqəmsal platformalara üstünlük verdiyi bildirilir.