Səfərbərlikdə rüşvət qalmaqalı: Yüksək rütbəli zabitlər məhkəmə qarşısında

Səfərbərlik və Hərbi Xidmətə Çağırış üzrə Dövlət Xidmətinin üç əməkdaşı rüşvət almaqda ittiham edilərək məhkəməyə çıxarılır. Bu işdə təqsirləndirilən şəxslər arasında Ağdaş rayon şöbəsinin rəisi Nurlan Abbasov, çağırış bölməsinin rəisi Şahlar Usubəliyev və həmin bölmənin zabiti Taleh İsmayılov yer alır.

Minval.info xəbər verir ki, Baş Prokurorluğun Mətbuat xidmətindən verilən məlumata əsasən, bu şəxslərin qanunsuz əməlləri ilə bağlı aparılan əməliyyat tədbirləri nəticəsində cinayət işi açılıb və istintaq tamamlanıb. İddialara görə, onlar 2025-2026-cı illərdə vəzifələrindən sui-istifadə edərək müxtəlif şəxslərdən rüşvət alıblar.

İstintaqın nəticələrinə əsasən, bu şəxslər xaricdə təhsil üçün qanunsuz möhlət hüququ verilməsi və ölkədən çıxışa məhdudiyyətin tətbiq olunmaması üçün rüşvət tələb ediblər. Toplanmış sübutlar əsasında onlara qarşı Azərbaycan Respublikası Cinayət Məcəlləsinin müvafiq maddələri ilə ittiham irəli sürülüb və məhkəmə qərarı ilə həbs olunublar. İş Tərtər Hərbi Məhkəməsinə göndərilib.