Neftin qiyməti Yaxın Şərq gərginliyi ilə zirvədə

Dünya bazarında neftin qiyməti Yaxın Şərqdəki gərginlik səbəbindən son bir ayın maksimumuna çatıb. “Brent” markalı neftin bir barelinin qiyməti 97,94 dollara yüksələrək iyulun 24-dən bu yana ən yüksək səviyyəyə çatıb. Analitiklər bu artımı ABŞ və İran arasında qarşılıqlı zərbələrin yenidən intensivləşməsi ilə əlaqələndirirlər. Bu vəziyyət qlobal neft tədarükündə mümkün fasilələrlə bağlı narahatlıqları artırıb.

Minval.info xəbər verir ki, Hörmüz boğazında tankerlərə qarşı hücumların artması da bazara təsir edən əsas amillərdən biridir. Regionda gərginliyin uzun müddət davam etməsi neft ixracının alternativ marşrutlarının axtarışını sürətləndirib. İraq “Bəsrə-Hədisa” neft kəmərinin Türkiyənin Ceyhan limanına və Suriyanın Banyas limanına qədər uzadılmasını nəzərdən keçirir. BƏƏ isə “Qərb-Şərq” neft kəmərinin istifadəyə verilməsini sürətləndirməyə çalışır.