Müəllimlərin müsahibə mərhələsi avqustun 26-da başlayır

Müəllimlərin işə qəbulu üzrə müsabiqənin müsahibə mərhələsi avqustun 26-da başlayacaq və sentyabrın 2-dək davam edəcək.

Minval.info xəbər verir ki, bu barədə Məktəbəqədər və Ümumi Təhsil üzrə Dövlət Agentliyi məlumat yayıb. Müsahibə zamanı namizədlərin peşəkar kompetensiyaları, psixoloji hazırlığı və ümumi dünyagörüşü müvafiq komissiya tərəfindən qiymətləndiriləcək.

Müsahibə mərhələsində uğur qazanan namizədlər ümumi təhsil müəssisələrində müddətsiz əmək müqaviləsi ilə işləmək imkanı əldə edəcəklər. Namizədlər şəxsi səhifələrində göstərilən tarixdə müsahibədə iştirak etmədikləri halda, bu, onların seçdikləri vakant yerdən imtinası kimi qeydə alınacaq və müddətli əmək müqaviləsi ilə işə qəbul turlarında iştirakları təmin edilməyəcək.