Maarifçi təcrübəsi: Naxçıvanda gənclərə yeni perspektivlər

“Maarifçi” tələbə-məzun proqramı Elm və Təhsil Nazirliyinin təşəbbüsü və Təhsilin İnkişafı Fondunun dəstəyi ilə 2024-cü ildən həyata keçirilir. Bu günə qədər proqramdan 102 gənc məzun olub. Hazırda 53 nəfər IV “Maarifçi” proqramı çərçivəsində Elm və Təhsil Nazirliyinin struktur bölmələri və tabeliyindəki qurumlarda, regional təhsil idarələrində, həmçinin Naxçıvan Muxtar Respublikasının Təhsil Nazirliyində təcrübə keçir.

Minval.info xəbər verir ki, Naxçıvanda təcrübə keçən “Maarifçi”lərdən biri, Nurtac Rəhimova, bu təcrübənin onun gələcək karyera planlarına əhəmiyyətli təsir göstərdiyini bildirir. 2005-ci ildə Naxçıvanda anadan olan Nurtac, Naxçıvan Dövlət Universitetinin “Kimya müəllimliyi” ixtisasını bitirib və hazırda Naxçıvan Muxtar Respublikası Təhsil Nazirliyinin Məktəbəqədər və ümumi təhsilin idarə edilməsi şöbəsində fəaliyyət göstərir.

Nurtac Rəhimova tələbəlik illərindən elmi fəaliyyətə xüsusi maraq göstərib və müxtəlif elmi müsabiqələrdə uğurlar qazanıb. O, “Maarifçi” proqramına təhsil sahəsində idarəetmə proseslərini öyrənmək və nəzəri biliklərini praktik təcrübə ilə möhkəmləndirmək məqsədilə müraciət edib. Təcrübə müddətində məlumatların təhlili, rəsmi sənədlərlə işləmək və komanda şəraitində fəaliyyət göstərmək kimi bacarıqlar əldə edib.

ƏLAQƏLİ

Bunu da oxu

Lerikdə 3.1 bal gücündə zəlzələ baş verib

17.09.2026 - 17:27

Nurtac, Naxçıvanın təhsil sistemində müşahidə etdiyi müsbət məqamlardan biri olaraq təhsil infrastrukturunun inkişafını və müəllimlərin peşəkar inkişafına göstərilən diqqəti vurğulayır. O, həmçinin “Gənc tədqiqatçılar platforması” adlı layihənin həyata keçirilməsini təklif edir ki, bu da şagirdlərin analitik düşünmə və elmi araşdırma bacarıqlarının inkişafına töhfə verə bilər.

Gələcəkdə təhsil sektorunda dövlət qulluqçusu və ya mütəxəssis kimi fəaliyyət göstərmək istəyən Nurtac, qazandığı bilik və təcrübənin təhsil sisteminin inkişafına töhfə verəcəyinə inanır.