Dünyanın ən uzun atı Hüqo lüks həyat yaşayır

İngiltərədə yaşayan Hüqo adlı at, 199 santimetr boya çataraq dünyanın yaşayan ən uzun atı kimi Ginnes Rekordlar Kitabına daxil olub. Bu unikal at, İngiltərənin Northemptonşir bölgəsində yerləşir və 4 yaşındadır. Onun boyu baytar tərəfindən ölçülərək təsdiqlənib.

Minval.info xəbər verir ki, Hüqonun sahibi Brett Masters, atın hələ də böyüməyə davam etdiyini və daha üç il ərzində boyunun artacağını gözlədiklərini bildirib. Hüqoya xüsusi qulluq göstərilir; mütəmadi olaraq masaj edilir, hər 6 aydan bir diş həkiminə aparılır və baytar nəzarətində saxlanılır. Atın böyümə plitələrinin həddindən artıq aktiv olduğu üçün sağlamlığı daim yoxlanılır. Hüqo, həmçinin müxtəlif qida əlavələri qəbul edir və onun üçün xüsusi qidalanma proqramı hazırlanıb.

Qeyd edək ki, indiyədək qeydə alınan ən uzun və ağır at 1850-ci ildə İngiltərədə yaşayan Sampson olub və onun boyu 2 metr 19 santimetr təşkil edib.