Pakistan rəsmisi: Azərbaycanın Kəşmir məsələsində dəstəyini yüksək qiymətləndiririk

Oxu.az-ın məlumatına görə, Pakistanın Bakıdakı səfirliyinin müvəqqəti işlər vəkili Sara İjaz “Kəşmirin qara günü” adlı tədbirdə çıxış edərək, Azərbaycanın Kəşmir məsələsində göstərdiyi dəstəyi yüksək qiymətləndirib. O, Cammu və Kəşmir ərazisində Hindistanın qanunsuz işğalı altında baş verən insan hüquqları pozuntularına diqqət çəkib.

Sara İjaz bildirib ki, 2019-cu il avqustun 5-də Hindistan Konstitusiyasının 370-ci və 35-A maddələrinin ləğvindən sonra bölgədə özbaşına həbslər, məhkəmədənkənar qətllər, media və kommunikasiya vasitələrinə məhdudiyyətlər tətbiq olunub. Bu addımlar ərazinin demoqrafik tərkibini dəyişdirmək cəhdləri kimi qiymətləndirilib.

Pakistan rəsmisi Cammu və Kəşmir məsələsinin beynəlxalq səviyyədə tanınmış mübahisə olaraq qaldığını vurğulayıb. O, birtərəfli addımların ərazinin mübahisəli statusunu dəyişdirə bilməyəcəyini və Kəşmir xalqının BMT Təhlükəsizlik Şurasının müvafiq qətnamələrinə uyğun olaraq öz müqəddəratını təyin etmək hüququnun pozula bilməyəcəyini qeyd edib.