Dünyaca məşhur "YouTube" ulduzu MrBeast evləndi

Dünyanın ən məşhur “YouTube” məzmun yaradıcılarından olan MrBeast sevgilisi Teya Boysen ilə ailə həyatı qurub.

Minval.info xəbər verir ki, bloger bu barədə “Instagram” hesabında toy mərasimindən fotolar paylaşaraq məlumat verib.

Yayılan görüntülərdə bəy ağ pencək, qara şalvar və kəpənək qalstukda, gəlin isə klassik gəlinlikdə əks olunub.

Məlumata görə, toy mərasimi britaniyalı milyarder Riçard Brensona məxsus şəxsi Neker adasında keçirilib. Mərasimə təxminən 70 nəfər dəvət olunub.

Qeyd edək ki, Teya Boysen Cənubi Afrikadan olan strimer, yazıçı və neyropsixologiya üzrə mütəxəssisdir. O, “Twitch” platformasında “TheaBeasty” adı ilə yayımlar aparır və “Instagram” hesabının 1,3 milyondan çox izləyicisi var.

Cütlük 2022-ci ildə Cənubi Afrikada tanış olub. Onların ilk görüşü ortaq dostlarının təşkil etdiyi şam yeməyi zamanı baş tutub.

Bildirilir ki, MrBeast şəxsi gəlirlərinin böyük hissəsini özünün təsis etdiyi “Beast Industries” şirkətinin inkişafına yatırır. Şirkət onun “YouTube” kanallarını, kontent istehsalını və digər layihələrini idarə edir.

Məlumata əsasən, təkcə 2024-cü ildə “Beast Industries” videoların hazırlanmasına təxminən 250 milyon dollar xərcləyib. Proqnozlara görə, şirkətin gəlirləri 2025-ci ildə 899 milyon dollara yaxınlaşa, ümumi dəyəri isə 5 milyard dollara çata bilər.